نئجه کی بیلیرسینیزآذربایجان شئعیرینین ان هوویتی
هیجالی اولماغیندادیرو بیر باخیشدان
دئمه اولارکی عروض وزنی بو دیلده عاریتی دیر
امما بو دیلین او قه ده ر چکیمی واردیر کی
عین حالدا عروض وزنینده یازیلابیلر کی بیر
کلمه سی ده اوزانمایا.
آمما من ایسته ییره م بونداندا اوستون بیر سوز دییه م
اودا بوکی بو دیل او قه ده ر تاریخ
بویوندا یونولوب سورتولوب تیلیشگه لری بیینده ن
گئدیب بیر گوزگوکیمی شافاقلانیب
آیدینلاشیب کی ایه ر بیری بو ظرافاتلارا
بو اینجه لیه لره ال تاپسا دئیره م بس کی فاس
شئعیرینده کی صنعتلره (استعاره ،تشبیه،کنایه،
تشخیص ،هابئله آیری لفظی و معنوی آرایه
لر ) شئعیر یازاندا نیازی اولماز.
من بعضن گنج شاعیر لریمیزه حیف سه له نیره م
کی بو دیلین اوزونه گوره مالیک اولان
گوزه للیه لرینده ن غفلتده قالیب ایره تی
و مصنوعی بیر اورتوگلردالیجان گزیر لر.
آی آنا
باغلییام ایسته یی نه کورپه چاغیندان آی آنا
چکمه ره م ال اوله نه جه ایاغیندان آی آنا
هله ده واردی منی منده ن ائدیر قوشمالارین
شئعیریم ایلهام آلیر دیل دوداغیندان آی آنا
هله ده داد وئریر آغزیمدا منیم تندیر آشین
هله ده دو یمامیشام قیقاناغیندان آی آنا
نهره لر ده ن اله گلمیش کره لر ده ن دیلیمه
بیر کره اولسا دامیزدیر اویاغیندان آی آنا
ها راچاتسامدا منیم کوک لریم آنجاق سو ایچیر
اللرین اوسته بیتن چار پاناغیندان آی آنا
ال دولاندیر یئنه کئچمیش لری سهمانلا دیریت
بیر نه زیه وئر منه تاختا تاباغیندان آی آنا
ایلمه ایلمه توخویورسان نه کونول خالچالارین
نه اوره لر آچیلیرلار یو ماغیندان آی آنا
نئجه کی کورپه لییمده منی گوزلردی گوزو ن
یئنه ده قویما ایتم گوز قاباغیندان آی آنا
اسگی چیلپه له ریمی چایدا یووان اللرینه
نه یازیم کی اولا اویغون ماراغیندان آی آنا
سئوینیرسن بالانین گولمه یینه قاچماغینا
دوتولورسان اوداداردورما ماغیندان آی آنا
قاچا قاچدا سنی اولده آتیب گوزده ن ایتیر
نه چتیندیر یاریمیرسان اوشاغیندان آی آنا
آیی نین مین اویونو واردی بیر آمروددان اوتور
نئجه کی قیردی منی اوزگه،تاغیندان آی آنا
قاپدی قاچدی منی بیرده ن بیره قوربت په له یی
ائله کی سن یئره قویدون قوجاغیندان آی آنا
هارا گئتسه م یئنه آنجاق قاییدیب گه لمه لییه م
اییلیب اوپمه لییه م گول آیاغیندان آی آنا
هورولموش فالی
نه قالی دیر نه ده کی شمس دئمیشکن حالی دیر
منی منده ن ائلییه ن آل یاناغیندا خالی دیر
هراوره گ بیرگئجه چیرپینماسا عشقینده سنین
اولمه سه سنده ن اوتوربیل کی حیاتدان دالی دیر
قیناما سن منی ، هر کیم بو وجاهتده سنی
گوروب عشقین اودونا یانماسا یاندیر مالی دیر
دئمیره م کونلومی چوخ سالمایا غم دریاسینا
هرنه ایلیر ائله سین یوخدو سوزوم اوز مالی دیر
یارین عشقینده گره کدیر پیشه سن یوخسا منیم
بیریئتیشمیش اوره گیم واردی کی کاللار کالی دیر
بالا کوزدور اوجاغیندا بو جلالیله گونش
آتینین دیر ناغی آلتیندا بو آی دا نالی دیر
مین دویون دوشسه تئلینده ن ایشیمه آزدی یئنه
او منیم باختیمین عالمده هورولموش فالی دیر
گولوشونده ن
دردیم یئنه بیر قونچه موعطر گولوشونده ن
تاپدیم یئنی جان گولشنه بنذه ر گولوشونده ن
دردیم آزالیب چیخدی جانیمدان ائوین آباد
ایسلاندی اوره گ باغچاسی اسمر گولوشونده ن
جان مولکونی چوخداندی کی قیتلیق بورویوبدور
گل بو قوزه ئی جنته چونده ر گولوشونده ن
دوشسمده ایه ر سنده ن اوزاق بزم طربده
ووررام یئنه گئنده ن گئنه ساغر گولوشونده ن
داوودی گوزه ل صوتیلا پیغمبر ائده ن کس
واردیر یئری ائتسین سنی رهبر گولوشونده ن
تبلیغ ائله سن مذهبینی گولمه گیلن سن
ایمان گتیره ر دینینه کافر گولوشونده ن
یول وار ایکی سینده ن ده چاتا جنته کونلوم
ایستر باخیشیندان اولا ایستر گولوشونده ن
هم درد اونا وئردین همی درمان سنه قوربان
بوندان داها آرتیق نه جان ایستر گولوشونده ن
وار هر نه یین عالمده بیلیرسن کی ذکاتی
گاهدان نه اولار پای منه گونده ر گولوشونده ن
